Trading dan Investasi
ad1
Iklan Gratis
MALPU 299 - PROSESI “MELAMAR” MENURUT ADAT JAMBI
Nadia
Desember 17, 2017
MEMBONGKAR ADAT LAMO PUSAKO USANG - Seri 299
Oleh: H. Aulia Tasman
Gelar Depati Muaro Langkap
Tanggal 18 November 2017
PROSESI “MELAMAR” MENURUT ADAT JAMBI
NINIK MAMAK YANG DATANG - disingkat NMYD
ASSALAMU’ALAIKUM WR.WB.
Dijawab oleh
NINIK MAMAH YANG NUNGGU - disingkat NMYN
WA’ALAIKUM SALAM WR.WB
NMYD:
DATUK – DATUK TUO – TUO TENGGANAI ALIM ULAMA CERDIK PANDAI, SERTO NANG TINGGI NAMPAK JAUH, NANG DEKAT JOLONG BASUO, NANG MENAPIK MATO PEDANG, NANG MANENTANG MATO ARI, NANG BAJALAN DULU SALANGKAH, NANG BAKATO LEBIH SAPATAH, SERTO SAGALO KITO NANG ADO DIRUMAH NANG SEBUAH IKO, RUMAH NANG DIATAS BATUTUP BUBU8NGAN PERAK, DIBAWAH NANG BAALASKAN SENDI GADING, RUMAH NANG BAPAGAR ADAPT, LAMAN NANG BASAPUKAN UNDANG, TEPIAN NANG BAPAGAR BASO, NANG KECIK DAK KAMI SEBUTKAN NAMONYO, NANG GEDANG IDAK KAMI PANGGIL GELARNYO.
“ SEIRING BALAM DENGAN BAREBAH
BAREBAH ADO DIDAUN BULUH
SEIRING SALAM DENGAN SEMBAH
SEMBAH KAMI SUSUN JARI NANG SEPULUH “
“ LAPUN MELAPUN KAMUARO
KERAP – KERAP KEANGSO DUO
AMPUN – AMPUN KEPADO NANG TUO
MAAF – MAAF KEPADO NANG MUDO “
ALHAMDULILLAH HIROBBIL ALAMIN. WASALA TU WASALA ……..dan seterusnya
NINEK MAMAK TUO TANGGANAI, PADA MALAM NAN BAIK, KATIKO NAN ILUK, KAMI DATANG BASAMO AYAM BA INDUK, SERAI NAN BARUMPUN. KAMI DATANG DARI JAUH MENEMPUH BUKIT NAN TINGGI LAH KAMI DAKI, LURAH DALAM LAH KAMI TURUN, GUNO UNTUK DATANG KERUMAH ................... SE KELUARGO NINEK MAMAK SUKU NAN SEBELAH, UNTUK ITU ATAS KE DATANGAN KAMI JANGAN PULO NINEK MAMAK TAGAMAN BAK DI TIMPO UPIH - TAKEJUT BAK DI TIMPO KASAU.
NAMUN SEBELUM MAKSUD NAK KAMI SAMPAIKAN ILOK UGO KITO DENGA SALAM DARI SERAI NAN BERUMPUN – AYAM DAN BERINDUK….
Minta salam dari orang tuo yang datang….. Assalamu’alaikum Wr. Wb.
Kemudian lanjutkan:
KEDATANGAN KAMI NAN BANYAK INI HANYO BASANGU PALIMAN NAN SABUAH YANG BARISI SIRIH NAN SACABIK PINANG NAN BATEMIS.
URANG DUSUN BATANAM MANGGIS
TUMBUH SEBATANG SIDALAM PADI
SIRIH BASUSUN PINANAN NAN BATEMIS
IKO YANG ADO DARI KAMI
PALIMAN NAN SABUAH MINTA DIBUKA SIRIH MINTA DIMAKAN, RUKUK SEBATANG MINTA DIISAP, ITU DULU YANG ADO DARI KAMI.
Boleh ditambah dengan satu atau dua pantun tentang sirih, untuk palemak kato, palemak unding. Dilanjutkan dengan menyerahkan nampan sirih kepada NMYN.
“ GEMUTUB BUNYINYO GENDANG
GENDANG SEBO MUARO JAMBI
KALU SIRIHNYO KALUKUP PINANGNYO MUMBANG
IKOLAH NIAN MAKANAN KAMI SEARI – ARI “
Nak Duo Pantun Sairing :
“ SIRIH KUNING DIDALAM NAMPAN
SEMAK JERAMILAH JADI SESAP
SESAPPUN LAH JADI RIMBO0 GANO
SIRIH KAMI JUGO MINTAK DIMAKAN
ROKOK KAMI MOHON DIISAP
TANDO SEMBAH SUDAH KAMI TERIMO “
NMYN:
ALHAM DULILLAH HIRABBIL ALAMIN. WASSALA TUWASSALA MU … dan seterusnya.
BAIKLAH, MANOLAH NINEK MAMAK SUKU NAN SEBELAH KAMPUNG NAN SABAGI. ALUA MAMAK ALUA PARADIK, ALUA SANAK TUO, ALUA PANAKAN DAN SAGALO KITO YANG HADIR. KOK KECIK IDAK DISEBUT NAMO, KOK GEDANG IDAK PULO DISEBUT GELANYO. SEBELUMNYO KAMI MINTA MA’AF, KAMI HIMPUN DALAM KATO YANG
SATU, SAUDARO-SAUDARO YANG KAMI HORMATI.
Sebelum acara dilanjutkan, NMYN juga memperkenalkan orang tuo dari anak gadis….
SAMO JUGO HAL NYO KAMI, IYO LAH DISURUH DATANG DIIMBAU TIBO OLEH ORANG TUO KAMI……..KITO DENGA PULO SALAM DARI BELIAU
ASSALAMU’ALAIKUM WR. WB. ….
KAMI SUSUN JARI NAN SAPULUH, KAMI TEKOU KEPALO NAN SATU, KAMI HUJAM LUTUT NAN DUO. SEMBAH KAMI TUJUKAN KEPADO DAN TUO-TUO, SERTO NINEK MAMAK SALAM KAMI TUJUKAN KEPADO SEGALO KITO NAN ADO KEPADO KITO NAN BANYAK, KARNO KAMI BAJALAN LAH DIDULU SALANGKAH KALAU BAKATO JUGO LAH DI DULU SAPATAH.
SESUAI BAK KATO SALUKO:
DARI JAUH KAPAL MALINTANG
PATAH TIANG MENIMPO KAMUDI
DARI JAUH KAMI KO DATANG
GEDANG MAKSUD DATANG KEMARI.
NMYN:
MEMANG IYO KATO NINEK MAMAK, MENURUT ADAT YAN TAPAKAI, SEBELUM UNDING TAJADI, KAMI JUGO ADO MAMBAWO SIRIH NAN SAKAPU, PINANG NAN SAKAPIT, ROKOK NAN SABATANG. KOK SIRIH KAMI MINTA DIMAKAN, RUKUK SEBATANG MINTA DIISAP.
Sambil berdiri mengantarkan nampan berisi sirih dan kelengkapannya kepada NMYD,
Kemudian baik diiringi pula dengan satu atau dua pantung tentang sirih…
GAMUTUP BUNYINYO GENDANG
GENDANG JENANG ILIA KA JAMBI
SIRIH KALUKUP PINANGNYO MUMBANG
IKO NIAN PAMAKAN KAMI
Nak duo pantun sairing, iringi satu pantun lagi
SIRIH KUNING DIDALAM NAMPAN
SEMAK JERAMILAH JADI SESAP
SESAP PUN LAH JADI RIMBO GANO
SIRIH KAMI MOHON DIMAKAN
ROKOK KAMI MOHON DIISAP
SEMBAH KAMI MOHON DITERIMO
NMYD:
MANOLAH NINEK MAMAK YANG SEBELAH KAMPUNG NAN SABAGI. KALAU SIRIH SUDAH SAMO-SAMO KITO MAKAN, KALAU ROKOK SUDAH SAMO-SAMO KITO ISAP WALAU IDAK BERASAP. SERI MUKO LAH BALIK KA MUKO, KOK LITAK YO LAH LPEH PULO.
NENEK MAMAK YANG KAMI HORMATI.
UNDING MUNGKIN DAPAT KITO MULAI, HARI LAH LARUT MALAM PULO. NINEK MAMAK…. GEDANGLAH WUJUD DENGAN NIAT, TINGGILAH ACAM DENGAN CEMAN, NAMUN DITURUT PADO DARI NYO KAMI KO. IBARATNYO IDAK MENEPIK MATO PARANG, IDAK TATETANG MATO ARI, TAPI MAK MANO LAH NAK NGATONYO. PEDIH-PEDIH HATI TATEKAN, MALU-MALU MUKO DI USAP, NAMUN MASUD HATI KO NAK KAMI SAMPAIKAN JUGO.
YANG MANO MAKSUD KEDATANGAN KAMI IOLAH MENGENAI, ANAK KEPONAKAN KAMI YANG BANAMO SI ...........ANAK DARI PADO SI .............DAN ............., NAMPAK NYO KINI KOK KECIK LA DIGEDANG, KOK RENDAHNYO LAH TINGGI, RENDAHNYO LAH MANUKEK LANGIT, GEDANGNYO LAH MEMENUHI ALAM, LAH PATUTNYO KO NAK BARUMAH TANGGO BATAPIAN TEMPATNYO MANDI.
LAH DIRAYAU PADANG NAN UJO, LAH DIRESO TALI NAN PANJANG, MENURUT JEJAK YANG TATUKIK RUNUT YANG TABENTANG, PIJAK NAN TATUKIK, KEBAWAH TAPAK, RUNUT NAN TABENTANG DI BAWAH TANGGO. PANDANG MATO DAK DAPAT DIKISA. KENO HATI DAK DAPAT PULO DI ALIH. BAK KATO PANTUN ANAK MUDO-MUDO
REMUJU DIDALAM PADI
GILANG DI ATEH BETO
LAH SETUJU DALAM HATI
LAH SAKILAN DARI MATO
IOLAH DENGAN ANAK BUAH ANAK PENAKAN NINEK MAMAK DI RUMAH SABUAH IKO, YANG BANAMO SI ........., MAKLUM LAH, SAMO-SAMO DI KASAP PENGEBAT ATAP, SAMO-SAMO DI JARUT PENGEBAT LANTAI, MAKSUD HATI NYO YO LAH DISAMPAIKAN KEPADO KAMI NAN TUO-TUO, LAH CUBO MANCARI NAN TALUCE, MENUKAP MANO NAN TATINGGAL, YO LAH BANYAK SUDAH YANG SUDAH DI RASO, ADAD PADANG KEPANASAN, ADAD BUMUN PENYELARO.
JADI ITULAH KEDATANGAN KAMI PADA MALAM NAN SAMALAM IKO, BAK KATO ADADNYO NGEPUK BUMUN MERAJAH GABING. KOK DUDUK KAMI NAK NUMPANG BATUIK, KOK TEGAK KAMI NAK NUMPANG BATANYO. MANOLAH TANYO KAMI TU KOK BATANG GEDANG TU LAH BACAP, KOK PUCUK TINGGI TU LAH ADO YANG GENTUNGNYO, SEBAB NGAPO KAMI TANYO, MAKLUM KAMI TAKUT TADORONG SALAH SIMPANG, SESAT SALAH JALAN.
TAKUT KELAK MELINTAS PENGUHULU, MEMELAT BATIN DI BALAI, TANYO KAMI DAK PULO BANYAK, KALAU DAK SESUAI JAWABAN DENGAN YANG DIHARAPKAN IDAK PULO KAMI BAKECIK ATI, BAK KATO URANGSESAT DIUJUNG TALI BALIK KE PAKAL TALI, KALAU SALAH JALAN BALIK KA SIMPANG JALAN. TANYO KAMI MINTAK DI JAWAB, YIOLAH APO ANAK GADIH NINEK MAMAK DIRUMAH INI APO LAH ADO YANG MENGIKATNYO, KALAU IBARAT BUNGO SUDAH ADO YANG MEGANG TANGKAINYO.
TAPI KALAU BELUM LAH ADO, KAMI DATANG MALAM INI YO NAK NGIKAT BUNGO NAN SATANGKAI..... SEBELUM DIJAWAB NINEK MAMAK, DENGA-DENGA PANTUN KAMI:
ANAK BUOYO MUDIK NGALUMBANG
MUDIK DITENGAH BATANG HARI
CUBO-CUBO MAIN GELOMBANG
KALU BIDUK NAN SAMPAI KE TEPI
ITU DULU NINEK MAMAK ....
Kemudian NMYN berunding sebentar dengan orang tuo anak gadis yang dituju, untuk mendengarkan langsung dari orang tuonyo apo anak gadis yang banamo ….. sudah ado yang datang untuk mengikat janji samayo. Sesudah itu dijawab
NMYN:
ALHAMDULILAH TERIMO KASIH, WALAU UNDING KAMI SEBENTA, BISIK-BISIK LAH TADENGA PULO DEK KITO YANG ADO. SETELAH KAMI BATUIK BATANYO PADO ORANG TUONYO, LAH DAPAT PULO JAWABANNYA. MANO LAH NINEK MAMAK SUKU NAN SEBELAH KAMPUNG NAN SABAGI. NAMPAK NYO SAMPAI KINI BELUM ADO YANG DATANG KERUMAH UNTUK MELAMARNYO. SAMPAI DISITU DULU NINEK MAMAK…
NMYD:
KALAU BEGITU JAWABANNYO, YO LAH KENDAK BALAM PADI REBAH. KAMI MERASO DAK DO LAH DAHAN YANG MENIMPO KUDUK, DAK ADO PULO RANTING BAKAL MEMETIK MATO.
TERIMA KASIH SEBELUMNYO LAH SENANG PULO HATI KAMI MENDENGARNYO. UNTUK ITU KAMI UCAPKAN TERIMO KASIH SEBELUMNYO. KAMI HENDAK NYAMPAIKAN MAKSUD DAN TUJUAN KEDATANGAN KAMI PADO MALAM INI, IOLAH HENDAK MELAMAR ANAK BUAH PANAKAN NINEK MAMAK YANG BANAMO SI ........ UNTUK KAMI IKAT DENGAN ANAK KEMENAKAN KAMI NAN BANAMO……. ITULAH DULU NINEK MAMAK…..
NMYN:
BAIKLAH NINEK MAMAK SUKU NAN SEBELAH KAMPUNG NAN SABAGI. LAH BENAH KATO NINEK MAMAK TU. KAWIN BA RADAD SARAK BAHUKUM. MENURUT ADAT MELAYU JAMBI, SUPAYO TEGAP RASO DI HATI, TENTU ADO YANG KAMI PEGANG. BUKAN KAMI TAKUT JANJI NDAK DIUNGKAI, BUKAN PULO TAKUT SABUNG DAK JADI. MAKONYO TENTU KAMI MINTA TANDO, TANDO NAK JADI. ITU DULU NINEK MAMAK.
NMYD:
BAIKLAH NINEK MAMAK, SUKU NAN SEBELAH KAMPUNG NAN SABAGI. KAMI UCAPKAN TRIMO KASIH. BAGI KAMI IDAK PULO TAKEJUT BAK DITIMPO KASAU, TAGAMANG BAK DITIMPO UPIH. ATAS PERMINTAAN NINEK MAMAK. KAMI SUDAH PULO MEMPERSIAPKAN ‘TANDO’ NDAK KAMI BAGIH BARUPO CINCIN ….. DAN KAIN SEPALULUSAN.
Kemudian NMYD mengantarkan kotak cincin kepada NMYN
NMYN:
WALAU TANDO SUDAH KAMI TARIMO, NAMUN KAMI BELUM BISO MENUTUSKAN MENERIMA ATAU TIDAK. ILOK JUGO KITO BATANYO PADO ORANG YANG LEBIH ARIF DAN BIJAK SANO. NAMPAK DIHADAPAN KITO INI ADO DATUK-DATUK, ORANG TUO CERDIK PANDAI, ALIM ULAMO DAN SELURUH PEGAWAI SYARAK. TARUTAMO KITO TUJU PADO DATUK-DATUK YANG HADIR.
Kemudian NMYN memutar silo duduknya menghadap Datuk Panengah:
MOHON AMPUN KAMI DATUK, SEMBAH KAMI TUJU KEPADO DATUK-DATUK. TOLONG BERI PETUNJUK DAN TITAH KEPADO KAMI, APO YANG TA ICO TA PAKAI DALAM ADAT MELAYU JAMBI TENTANG TANDO LAMARAN. ITU DULU SEMBAH KAMI DATUK!
DATUK PENENGAH
YANG KAMI HORMATI NENEK MAMAK KEDUO BELAH PIHAK, SERTO NENEK MAMAK TUO – TUO TENGGANAI, ALIM ULAMA CERDIK PANDAI, NANG ADO DIDALAM RUMAH NANG BAPAGAR ADAT, LAMAN NANG BASAPU UNDANG, TEPIAN NANG BAPAGAR BASO, TERLEBIH DAHULU SAYO ANGKAT JARI NAN SEPULUH, SAYO TUNDUKAN KEPALO NANG SEKOK, SAYO HATURKAN SEMBAH NAN SEBUAH, NANG KECIK DAK KAMI SEBUT NAMONYO, NAN GEDANG DAK PULA KAMI HIMBAUKAN GELARNYO.
ADA PUN ADAT NANG TAECO PAKE DALAM DATING DUDUK MELAMAR YAITU :
1. CINCIN SABENTUK, LENGKAP DENGAN SURATNYO.
2. PAKEAN SAPALULUSAN, DASAR BAJU, SELENDANG DAN PAKEAN DALAM.
MASALAH SANGSI DUDUK BATUNANGAN ITU ADOLAH, IKAT JANJI SEMAYO KEDUO BELAH PIHAK, TANDO KESUNGGUHAN HATI SABELAH MENYEBALAH, WALAUPUN DEMIKIAN ADO JUGO BAIKNYO SAYO SAMPEKAN NANG BIASO DIBUAR DI DESA / KELURAHAN KITO KO :
1. KALU SALAH DIJANTAN, TIBO – TIBO JANTAN MANGUNGKAI JANJI DAK NDAK LAGI, AYAM JANTAN DI INGGIRAN DAK ADO BAKUKUK LAGI, NGORAK SILO, IYOLAH MAS TALUCIR PULANG MANDI, TEBU SARUAS LENDOAN GAJAH, ARTINYO APO YANG DIANTARKAN IKO HILANG SAJA.
2.KALU SALAH DIBATINO, TIBO – TIBO BATINO MURTAD DAK NDAK LAGI, AYAM BATINO DIPATARANGAN DAK BAKOTEK LAGI, MAKO APO NANG DIANTARKAN IKO, SO BALIK DUO.
ITULAH SANGSIH HUKUMNYO DIDALAM DUDUK BATUNANGAN IKO.
SAYO RASO INILAH YANG DAPAT SAYO SAMPEKAN, KOK ADO NANG SALAH JANGGALNYO DALAM PENYAMPEAN SAYO, IDAK PADO IKAN JALO TA AMBUR, IDAK PADO LUBUH TUBO DICAMPAKKAN, MOHON MAAF SEBANYAK – BANYAKNYO DAN SAYA AKHIRI………………..
WABILLAHI TAUFIQ WAL HIDAYAH
WASSALAMUALAIKUM WARAHMATULLAHI WABAROKATUH
NMYN:
BETUL JUGO KATO DATUK TU, KARENO KINI KO DAK ADO LAGI PUNGGUK NANG MANIMPO KUDUK, DAK ADO LAGI RANTING NANG NYUCUK MATO,
“ DAK ADO LAGI BATEMU DENGAN TANAH NANG BABONGKAH
NANG ADO TANAH NANG BAPAYO
DAK ADO LAGI BATEMU KATO NANG BATINGKAH
NANG ADO KATO SAIYO “
MAKO :
“ CUKIK DAMAR PELITO KATAYO
DICUKUK DENGAN JARI TANGAN
KARENO KITO LAH SAIYO SEKATO
MARILAH KITO BAJABAT TANGAN “
WABILLAHI TAUFIQ WAL HIDAYAH
WASSALAMUALAIKUM WARAHMATULLAHI WABAROKATUH
NMYD:
WAALAIKUM SALAM WR. WB.
Kemudian NMYD dan NMYN membuka jalan agar kedua orang tua dapat berjabat tangan sebagai tanda akhir dari acara “Melamar” menurut adat Jambi.
Tidak ada komentar :
Posting Komentar
Leave A Comment...